Şəhid Baladov Ruslan Allahyar oğlu

Şəhid Baladov Ruslan Allahyar oğlu

1997-ci il sentyabrın 18-də Hacıqabul şəhərində anadan olmuşdur.

2012-ci ildə Hacıqabul şəhər şəhid N.Ağayev adına 4 saylı orta məktəbi bitirən Ruslan 

sonra  Şirvan şəhər İqtisadiyyat və Humanitar Kollecini idman ixtisası üzrə bitirmişdir.

2016-cı ildə Beyləqan bölgəsində həqiqi hərbi xidmətə başlamış, Mingəçevir şəhərində sürücü-mexanik kursunda təhsil almış, hərbi ixtisası minomyot atıcısı olmuşdur.

 2020-ci il sentyabrın 27-də  Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zaman, sentyabrın 28-də Tərtər rayonunun Talış kəndi uğrunda gedən döyüşlərdə idarə etdiyi BMP (piyadaların döyüş maşını)  ilə düşmənin bir-neçə tankını, onlarla döyüşçüsünü məhv etmiş və şəhid olmuşdur, Azərbaycan Respublikasının ərazi bütövlüyünün  təmin edilməsi uğrunda döyüş əməliyyatlarında iştirak etmiş və hərbi hissə  qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş Baladov Ruslan Allahyar oğlu Azərbaycan Prezidenti  İlham Əliyevin  15.12.2020-ci il tarixli Sərəncamına əsasən ölümündən sonra  “Vətən uğrunda” medalı ilə və Azərbaycan Respublikasının Suqovuşan kəndinin işğaldan azad edilməsi uğrunda aparılmış döyüş əməliyyatlarında iştirak edərək igidlik və mərdlik nümunəsi göstərdiyinə görə  “Suqovuşanın azad olunmasına görə” medalı ilə təltif deilmişdir.

2020-ci il oktyabrın 4-də rayon ictimaiyyəti nümayəndələrinin iştirakı ilə el qəbristanında dəfn edilmişdir. 

Allah bütün şəhidlərimizə rəhmət eləsin !

 

Şəhid Mahir Şəfa oğlu Hüseynov

 

Şəhid Mahir Şəfa oğlu Hüseynov

 1975-ci il sentiyabrın 19-da Quzanlı kəndində anadan olub. 1993-cü ıldə orta məktəbi bitirəndən sonra qısa bir müddətdə kolxozda çalışıb. Həmin il oktyabrın 4-də Azərbaycan ordusunda həqiqi hərbi xidmətə çağrılıb. Əsgərliyinin ilk aylarını əvvəlcə Bakıda, sonra Qusarda - təlim düşərgəsində keçirib.

1994-cü il fevralın 3-də təlimi başa vurmuş bir qurub əsgərlə Tərtər bölgəsinə göndərilib. Ağdərə bölgəsinin bir sıra məntəqələrinə kəşfiyyata gedən Mahir dəfələrlə ordumuzun bölmələrini zəruri məlumatlarla təmin edib,işğalçıların planlarını pozub. Çaylı kəndində kəşfiyyatda olanda düşmənin arxasına keçərək ermənilərin 2 tankını, 1 PDM-ni təkbaşına məhv edib.

1994-cü il aprelin 18-də Ağdərənin Həsənqaya məntəqəsi uğrunda gedən döyüşdə minaatan qəlpəsindən şəhid olub.

Azərbaycan Respublikası Prezidentinin fərmanı ilə Mahir Şafa oğlu Hüsenov ölümündən sonra "Döyüş xidmətinə görə" medalı ilə təltif olunub

Allah rəhmət eləsin !

Şəhid Sadiq Kamal oğlu Zeynalov

Şəhid Sadiq Kamal oğlu Zeynalov

1998-ci il sentyabrın 19-da Astara rayonunun Ərçivan qəsəbəsində anadan olub.

Sadiq Zeynalov 2016-2018-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2018-ci ildən isə müddətdən artıq həqiqi hərbi xidmət qulluqçusu olaraq xidmət edirdi.

Azərbaycan Ordusunun kiçik çavuşu olan Sadiq Zeynalov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın, Füzulinin və Qubadlının azadlığı uğrunda gedən döyüşlərdə savaşıb. Sadiq Zeynalov oktyabrın 25-də Qubadlı döyüşləri zamanı şəhid olub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Sadiq Zeynalov ölümündən sonra "Vətən uğrunda" medalı ilə təltif edildi.

Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Sadiq Zeynalov ölümündən sonra "Cəbrayılın azad olunmasına görə" medalı ilə təltif edildi.

Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Sadiq Zeynalov ölümündən sonra "Füzulinin azad olunmasına görə" medalı ilə təltif edildi.

Allah rəhmət eləsin!

 

Şəhid Balayev Orxan Vidadi oğlu

Şəhid Balayev Orxan Vidadi oğlu

18.09.1998-ci ildə Quba rayonunAlpan kəndində anadan olub. 2004-cü ildə Alpan kənd orta məktəbinə, 1-ci sinifə qəbul edilib. Məktəbi 2015-ci ildə bitrib. 2016-cı ildə hərbi xidmətə çağırılıb. 2018-ci ildə hərbi xidməti bitirdikdən sonra 3 aylıq gizirlik kursunu keçərək Yevlax-Aran korpusundakı N-saylı hərbi hissədə həmlə qrupunda xidmətə başlayıb.

Vətən müharibəsi başlayan gün, 27 sentyabr 2020-ci ildə ağır döyüş əməliyyatlarında iştirak edib. Döyüş zamanı qəhrəmanlıq göstərən Orxan düşmənin bir neçə tankının hərbi qənimət kimi ələ keçirilməsində də iştirak etmişdir. Onun sonuncu döyüşü Suqovuşan uğrunda gedən ağır əməliyyatlar olmuşdur.

Sonuncu dəfə 6 oktyabrda ailəsilə danışan Orxandan bir daha xəbər çıxmır. Əvvəlcə onun şəhid olması barədə ailəsinə məlumat verirlər. Hətta onun nəşinin kəndimizə gətiriləcəyi deyilirdi. Sonra onun itkin düşməsi haqqında məlumat gəldi. Ailə biraz ümüdlənmişdi ki, Orxan sağ-salamatdı. Amma 55 gün sonra Orxanın Şəhid olması xəbəri ailəsinə verilir. 30 noyabr 2020-ci ildə Orxan Alpanda Xarman qəbiristanlığında dəfn edilib.

Allah rəhmət eləsin!

Məmmədov Tural Elxan oğlu

Məmmədov Tural Elxan oğlu

Tural Məmmədov 1990-cı il sentyabrın 17-də Qazax rayonunun Qızılhacılı kəndində anadan olub.

 1996-2007-ci illərdə Qazax şəhərində S. Vurğun adına 2 nömrəli tam orta məktəbdə təhsil alıb. Ailəli idi. 2 övladı yadigar qalıb.

Tural Məmmədov 2008-2010-cu illərdə Azərbaycan Silahlı Qüvvələrinin Ağcabədi rayonunda yerləşən "N" saylı hərbi hissəsində müddətli həqiqi hərbi xidmətdə olub. 2016-cı ildən isə müddətdən artıq həqiqi hərbi xidmət qulluqçusu idi.

Azərbaycan Ordusunun əsgəri olan Tural Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Murovdağ istiqamətində gedən döyüşlərdə savaşıb. Tural Məmmədov sentyabrın 27-də Murovdağ döyüşləri zamanı şəhid olub. Uzun müddət nəşi tapıla bilməyib. 11.12.2020-ci il tarixində Qazax rayonunda dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Tural Məmmədov ölümündən sonra "Vətən uğrunda" medalı ilə təltif edilib.

Şəhif Elgün Vasif oğlu Quliyevin

Şəhif Elgün Vasif oğlu  Quliyev

 

1992-ci ilin 17 sentyabr tarixində Şamaxı rayonunun Göylər kəndində anadan olub.

1998-ci ildə T.Kərimov adına Şamaxı rayonu Göylər kənd 2 saylı tam orta məktəbin birinci sinfinə daxil olub. Sonrakı illərdə İsmayıllı və Şəki şəhərində orta məktəb təhsilini davam etdirib. Eyni zamanda 2008-ci ildə Şəki İslam Kollecindən məzun olub.

2009-cu ildə tam orta təhsilini başa vurduqdan sonra 2010-2014-cü illərdə Sumqayıt Dövlət Universitetinin Tarix fakültəsində “Tarix müəllimliyi” ixtisasına yiyələnib.

2020-ci ildə müəllimlərin işə qəbul imtahanından keçərək Lerik rayonunun Sors kəndində işə qəbul olub.

Elgün Quliyev 2014-cü ildə müddətli həqiqi hərbi xidmətə çağırılıb.

2014-2015-ci illərdə Azərbaycan Silahlı Qüvvələrinin Füzuli rayonunda yerləşən “N” saylı hərbi hissəsində xidmət edib.

Azərbaycan Silahlı Qüvvələrinin əsgəri olan Elgün Quliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı könüllü olaraq Şuşanın azadlığı uğrunda gedən döyüşlərdə iştirak edib.

Elgün Quliyev noyabrın 9-da Şuşa döyüşləri zamanı şəhid olub. Şamaxı rayonunun Göylər kəndində torpağa tapşırılıb.

Şəhid Elgün Quliyevin son sözlərindən biri belə olmuşdur;

" Tarix müəllimi ola bilməsəm də, yəni işləyə bilməsəm də, bəlkə tarix yazdım. "

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Elgün Quliyev ölümündən sonra "Vətən uğrunda" medalı ilə təltif edildi.[2]

Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Elgün Quliyev ölümündən sonra "Şuşanın azad olunmasına görə" medalı ilə təltif edildi.

Şəhid Elgün Rauf oğlu Kərimov

Şəhid Elgün Rauf oğlu Kərimov

17.09.1999-cu ildə Yevlax rayon Aran 1 qəsəbəsində dünyaya gəlib. 15.09.2006-cı ildə Yevlax rayon Aran qəsəbə 1 saylı tam orta məktəbin 1-ci sinfinə daxil olub. Uşaq yaşlarından İdmana xüsusi marağı olan Elgün bir çox turnirlərdə qalib kürsünün ən yüksək zirvəsində yer alıb. 2017-ci ildə Həmin məktəbdən məzun olaraq Ali məktəbə qəbul olsa da, Maddi imkan olmadığından təhsilindən imtina edərək müddətli həqiqi hərbi xidmətə gedib. Şəmkir rayon “N” saylı Hərbi Hissənin Kəşfiyyat bölüyündə xidmət edən Elgün nümunəvi əsgər olub. Hərbi xidməti başa vurdurqdan sonra müxtəlif yerlərdə çalışan Elgün Vətən müharibəsindən 1 ay əvvəl MAHHQ kimi Ordu sıralarına yazılaraq öz Kəşfiyyatçı peşəsini davam etdirib. 27.09.2020-ci ildə Azərbaycan Ordusunun əks-Hücum əməliyyatına başlama əmri gəldiyi andan kəşfiyyatçı kimi döyüşlərdə ön sralarda olan Elgün Talış kəndi və Suqovuşan qəsəbəsinin işğaldan azad olunmasında böyük qəhrəmanlıqlar göstərib16.10.2020-ci il tarixdə Suqovuşan istiqamətində yeni yüksəkliklərin azad olunması uğrunda gedən döyüşlərdə döyüş yoldaşlarını mühasirədən çıxararaq qeyri-bərabər döyüşdə qəhrəmancasına Şəhid olub. Döyüş yoldaşlarının dediklərinə əsasən Elgün döyüşlər başlayan gündən 7 dən çox uğurlu əməliyyatda iştirak edib, son əməliyyatında qeyri-bərabər döyüşdə düşmənin 60-a yaxın canlı qüvvəsini məhv edərək , döyüş yoldaşlarını mühasirədən çıxarıb və düşmənin snayper atəşi nəticəsində Şəhadətə yüksəlib. Elgün Mərd və Qorxmaz hərbiçi idi, öz komandirinin dediklərinə əsasən hücuma keçərkən ən öndə gedərdi. Elgün Şəhid olacağını hiss etmişdi sanki, ölümündən bir gün əvvəl bu məktubu yazıb saxlamışdı: “Mən sizləri ayrı-ayrılıqda çox çox istəyirəm, başda qardaşım olmaqla. Siz mənim canlarımsınız. İnşallah Şəhid olanda, bu mesaj əlinizə keçəndə oxuyarsınız. Əgər ölsəm məni bağışlayın ki, sizi mənsiz qoydum. Bilirəm çətindi, çətin bir şeydir,  amma belə olmalıdı. Allah sizə yar olsun. Allah Amanında, haqqınızı halal edin Vətən sağ olsun!”Şəhid Elgün Kərimov 17.10.2020 ci ildə Yevlax rayon Aran Qəsəbəsində böyük izdihamla son mənzilə yola salınıb.